Topptur til Årnoteren frå Raudkleiv
Turen startar frå Raudkleiv, der du finn god og romsleg parkeringsplass rett ved skianlegget. Herfrå følgjer du godt merka sti oppover mot Årnoteren – ein kjend og populær utsiktstopp i Seljord.

Årnoteren ligg om lag 700 meter over havet, og frå toppen får du eit flott utsyn over Seljord sentrum, Skorvefjell, Hattefjell og Bjørgefjell. I klarvêr kan du sjå langt utover Vest-Telemark og inn i nabokommunane.

Turen er lett til middels krevjande, og dei fleste klarer den fint på rundt ein time kvar veg. Det siste stykket opp mot toppen – ca. 4–500 meter – er noko bratt, men det går fint om ein tek seg god tid. Underlaget vekslar mellom god sti, litt myr og fjellberg, så gode sko er ein fordel, særleg om det har vore vått.

Langs ruta passerer du både Havretjønn og Årnotertjønni, to små idylliske vatn som gjer turen ekstra triveleg. Dette er ein populær tur for familiar, hundeeigarar og mosjonistar – og mange brukar turen som ein ettermiddags- eller kveldstur.

Årnoteren eignar seg òg godt som ein del av ein lengre rundtur for dei som ønskjer ei utvida løype, og om vinteren kan ein gå topptur på ski med start frå same parkeringsplass.